Dick u feiss hock i uf mym Stüehli
Vor em Bildschirm, schön vernetzt dank Interface
I ha d Wält bi mir ir Stuben inn
U nachem Sinn frag i scho lang nümm
Zwar chan i nid schlafe bi geng pressiert
Muess geng luege, dass nüt passiert
Es bländet, s isch ei Hitz
We der gschpaltet Chärn wider verschmiuzt

S isch no nid lang här, wo mir ali no
Halb Aff, halb Mönsch, halb Ängel si gsy
Mit Stei u Holz, u ohni Füürzüg, ohni Papier
Hei probiert es Füürli zmache
Für chly Liecht, für chly Wermi
Hei mer e ganze Planet gha, Hey! isch das z weni?
Mir hei baschtlet und hei Zügs erfunde
U mir hei no richtigi Lieder gsunge

I weiss nid wohi, d Zyt geit verby
I ha ke Ahnig, vo wo si chunnt
Wenn d Zyt isch cho, aber es chunt e Zyt

Wenn de alles düre, verbrönnt, verlochet isch
Und es blybt nume no Khüder under em Tisch
Kabutt vom Chrieg, vor Wuet, vor Fluet
U kene meh het richtig Muet
We mer nume no chöi useluege wie der Zyklop
U tuusig Stärne gseh mit em Teleskop
We de der Himel abegheit u der Bode nümm rächt steit
Und em Einstein syni Glychig nümm ufgeit

I weiss nid wohi, d Zyt geit verby
I weiss nid vo wo, si chunnt, wenn d Zyt isch cho, aber d Zyt isch cho

Vori isch jitze scho verby
U jitz isch vori no nid gy
Das wo chunnt isch no nie gsy
U chuum isch's da so isch es scho verby
Vilicht steit d Zyt würklech still
Faht niene n aa und hört niemeh uuf
U mir flüge drann verby
Sägle ewig mit däm grosse Schnuuf

I weiss nid wohi, d Zyt geit verbii
U i weiss nid vo wo, si chunnt, wenn d Zyt isch cho
I weiss nid wohi, d Zyt geit verbii
I weiss nid vo wo, si chunnt, aber d Zyt isch choo

[top]