News__ Music__ Biografie__ Discografie__ Fotogallerie__ Booking__ Kontakt

heimat
i dänke zrügg, un i bsinne mi
a die zyt, won i no ching bi gsy
wo d' wäut soooo gross isch gsy
un ig, no soooo chly!
won i ha bisons gjagt uf der prärie
wo zwüsche beidne wohnblöck isch gsy
wo 'lassy', 'winnetou' und 'fury'
weisch no, sy üsi fründe gsy.
d' anita isch mys schätzi gsy
u drum isch d' bärble nydisch gsy
my wäut isch denn no ganz gsy
ganz klar, i bi deheime gsy!

heimat, heimat
wo bisch du häre choo?
heimat, heimat
uuf u dervooo...
heimat, heimat
es isch geng früehlig gsy
heimat, heimat
ha dänkt, 's duuri ewig so...

später de, verjagt us em paradies
hei mer öpfu gfrässe bis zum dünnsch...
totau bireweich symer denn gsy
aber stei-hert, geng derby
glücklech symer scho lang nümme gsy
hei immer müesse "stoned" sy
mit 'kiff' u mit chli 'lsd©'
hei mer kämpft für d´anarchie
hei gfunge 's syg e schweinerei
u du symer uszoge, dehei
u 's het üs tünkt, di wäut syg chly
u mir syge derfür ganz gross derby!

heimat, heimat
was hei si mit dir gmacht?
heimat, heimat
zur sou, mit ihrer macht
heimat, heimat
e heisse summer, isch es g'sy
heimat, heimat
du bisch nümm umegsy!

u ei nacht gan i ga spaziere, alei
eme fluss entlang, bim mondschyn
un i louffe vorwärts, zimlech wyt
dür mängi gass hallet my schritt
un i tröime so chli vor mi hi
tröime, u merke's gar nid
dass es herbscht isch worde, derby
i louffe wyter, u cha's nid la sy
u plötzlech isch aues häll u klar
d' wäut isch gross u wunderbar
u d' wäut bisch du, u d' wäut bin ig
u plötzlech, bin i wider da
deheim...

heimat, heimat
bisch ändlech umecho
heimat, heimat
i mir inne, han i di mitgnoh...
heimat, heimat
's geit nid ume ne bitz land
heimat, heimat
septämber in leningrad

heimat, heimat
i bi zimlech umecho
heimat, heimat
ha so mänge wäg unger d´sohle gnoh
heimat, heimat
aber i aune gasse hallet 's glych
heimat, heimat
octobre à paris

heimat, heimat
's geit vil wyter als bis zum gartezuun
heimat, heimat
und es füllt vil meh als nume ruum
heimat, heimat
eso weich, so bequem
heimat, heimat
novämber in jerusalem

heimat, heimatland - nomau
heimat, heimat
itz begryff 's doch ändlech mau
's geit nid um d´dicki vo dym portemonnaie
's geit nid um weniger, u nid um meh
's geit nid um d' farbe vo dyre hut
mängisch isch es lyslig u mängisch lut

heimat, heimat
genau di suechen ig
heimat, heimat
u derby stecksch du doch zmitts i mir

heimat, heimat
mängisch bisch du wien es lied
heimat, heimat
u mängisch ghören i di nid...

[top]