e träne louft mer über ds gsicht u tropfet abe
uf en ölfilm im dräckige meer
wo sech der grau himu spieglet drinn
u der rägebogefilm louft usenang
un es härz entsteit, us ere träne
us mym oug

i luege no däm riseschiff nache
wo sech e wyssi schuumstrass im graue meer macht
u ne möwe flügt hingerdry
kreiset höch über däm ysekahn
i schicke myni liebi mit
si söll se ihre ga nachetrage...

über d's meer
geit si furt vo mir
über d's meer dervo
i cha nid mit, i blybe da

i gseh se no ar reling stah
und e träne gsehn i, i gloube dra
us ihrem oug, über di schöni backe
knapp am muu verby
won i ersch no grad küsst ha
u gseh, wie sech die träne vom chini trennt
u wie si nach eme länge flug, ir gischt ungergeit.

i däm meer
bin i geng mit dir
i warten uf dys widercho
o we du furt bisch, du bisch geng da

un e hafenarbeiter jagt mi wägg, ire frömde sprach
i säge: 'ja, ja, scho guet, scho rächt!'
und luegen es letschts mau no
däm chlyne pünktli nache
wo sech fies im dunscht versteckt
bis er drinn verschmilzt
so wie üsi tränen ir unändlechkeit
töif inenang, verschlunge sy

i däm meer
bisch du geng mit mir
i wär so gärn mit dir cho
und i rüefen es letschts mau: 'bitte, blyb doch da...'

i chehre zrügg, i di verrückti wäut
aues springt u rennt dürenang
i weiss nümm, bin ig im film
oder söu das d'würklechkeit sy?
u der lärme fadet langsam uus
und i ghören e sanfti melodie...

's isch ihri stimm
u si summet lyslig
es si numen es paar wort:
'jeg elsker dig'
si liebi mi, aber...

über d's meer
isch si furt vo mir
über d's meer, dervo
i cha nid mit, i blybe da
i däm meer
bin i geng mit dir
über ds meer, dervo
i cha nid mit, i blybe da
über d's meer
isch si furt vo mir
i wär so gärn mit dir cho
i rüefen es letschts mau, bitte blyb doch da.
über d's meer
isch si, furt vo mir
über d's meer, dervo
i cha nid mit, i blybe daa
[top]